Hvernig markaðssetur maður óáþreifanlega nauðsynjavöru eins og rafmagn?

Í vikunni hélt ég kynningu á mínum vinnustað Orkusalan þar sem við í markaðsteyminu fórum yfir árangur og verkefni síðasta árs. Þar kom ég m.a. inn á áskorunina að markaðssetja óáþreifanlega nauðsynjavöru, rafmagnið, sem við tökum öll dálítið sem gefnu og spáum ekki mikið í.

Áskoranirnar

• Varan er óáþreifanleg
• Hún er eins hjá öllum, óháð því hver selur
• Hún er sjaldan ofarlega í huga fólks
• Tregða við að skipta, fólk skiptir örsjaldan um raforkusala
• Verðmunur er lítill

Hér er ekki verið að selja vöru per se. Heldur að selja traust, einfaldleika og tilfinningu. Aðgreining á markaði þarf að tengjast upplifun á vörumerki og þjónustu.

Nokkrir hlutir sem ég hef lært af því að markaðssetja vöru á einsleitum markaði eins og raforkumarkaðinum

• Ef þú talar bara um eiginleika, ertu eingöngu að keppa í verðum
• Ef fólk nemur engan mun á upplifun á vörumerkinu, skiptir það ekki um raforkusala
• Ef þú nærð ekki að vinna bug á tregðunni á markaðnum, skilar aukin vitund litlu
• Það er sífellt erfiðara að ná athygli fólks, ekki síst á þessum markaði.

Markaðssetning á einsleitum markaði snýst ekki um að öskra hæst. Hún snýst um að byggja upp hughrif þannig að ákjósanleg merking sé til staðar í huga fólks þegar þörfin myndist.

Fyrir þau sem eru að markaðssetja „óspennandi" vörur

Það er ekki varan sem er óspennandi heldur mögulega sagan sem þú ert búin að vera að segja.

Gettu hver raforkusalinn er!

Ég lét gervigreindina greina 4 vefi raforkusala og hleðslufyrirtækja og bað hana að búa til karakter sem hún skilgreinir út frá tón vörumerkjanna Orka náttúrunnar (ON Power), HS Orku, Orkusölu og Ísorku. Getið þið giskað hvaða mynd er hvað?